巴基斯坦 - 女生參加婚禮前的秘密
話説已經到左巴基斯坦一段時間，每日忙參加婚禮活動，唔係玩到半夜就玩到天光，真係好攰但又好開心！
昨日係正式嘅婚禮，為左隆重其事全部比較和一對新人親的女性都一定會去化妝set 頭！ 嚟到巴基斯坦咩都試過但化妝set 頭就未試過，見佢哋個個都化得唔錯即管試下！
表妹帶我去一間表面上係豪宅，實際𥚃面係美容院加salon 嘅地方，結婚旺季人人都要去婚禮所以好多女生去扮靚！個個都希望著得靚但個樣都要襯😍
我事前已講左幾次化得輕手啲就得，好驚佢哋化到我成個阿梅咁🤦🏻♀️化妝姐姐熟手技工咁好快化完一個之後到我，我留意到佢哋D化妝次序同我所知嘅有啲出入，化曬眼妝先搽粉底！ 不過唔理啦，效果好就得！
我強烈感覺到佢好用心咁幫我打陰影！好明顯我同巴基女生輪廓差太遠，扁口扁面又唔係深眼窩粗眉大眼睛所以對於化妝姐姐應該有啲難度！到我一打開眼見到個妝已經好驚！！！我人生中從未試過化如此濃嘅妝🤦🏻♀️又唔好意思喺化妝師面前抹走！ 死啦！點算好！ 但全部姨媽表妹見到我都話「pinky , you look good ! 」化妝師話你到左會場燈光下會睇落無咁勁咖！然後唯有靜雞雞用紙巾再印走D陰影同眼影😂
番到屋企連細佬都話look good ，聽左十幾次you look good 就當good 啦！🤪巴基式化妝連set 頭盛為港幣$100，又幾抵喎！ 終於知道點解佢哋晚晚都可以轉look 😝
所謂巴基式化妝體驗，化之前幻想應該同茉莉公主差唔多，但化左之後⋯⋯無變阿梅都算🤪試過一次就夠！ 😂好彩到左現場有超過一百個人同我講今日你好靚，可能係之前無論我個樣或者件衫都太樸素似落街買餸咁😝😝
放心我無轉style寫美容blog😝，仍然寫旅遊的，下一篇終於到正式婚禮！
《待續》
別忘了把Facebook專頁為"搶先看"（See first）以及"開啟通知"（Notification On）
較詳盡的更新在Facebook: indiapinkpink
濕濕碎碎的更新在Instagram：indiapink
Search